રશિયા બાદ PM મોદી ઓસ્ટ્રિયાના પ્રવાસે પહોંચ્યા, આ છે ચાન્સેલર સાથે પ્રાઈવેટ ડિનર, CEO સાથે મુલાકાત સહિતનો સંપૂર્ણ કાર્યક્રમ

વડાપ્રધાન નરેન્દ્ર મોદી રશિયાની બે દિવસની મુલાકાત બાદ ઓસ્ટ્રિયા પહોંચી ગયા છે. પીએમ મોદીની આ એક દિવસીય ઓસ્ટ્રિયા મુલાકાત ઘણી વ્યસ્ત રહેવાની છે. આ દરમિયાન તેઓ ઓસ્ટ્રિયાના રાષ્ટ્રપતિ એલેક્ઝાંડર વાન ડેર બેલેનને મળશે. તેઓ ભારત અને ઓસ્ટ્રિયાના બિઝનેસ લીડર્સને પણ સંબોધિત કરશે.

ઓસ્ટ્રિયા પહોંચતા પીએમ મોદીનું રેડ કાર્પેટ સ્વાગત કરવામાં આવ્યું હતું. છેલ્લા 40 વર્ષમાં ભારતીય વડાપ્રધાનની ઓસ્ટ્રિયાની આ પ્રથમ મુલાકાત છે. વિયેના એરપોર્ટ પર ઓસ્ટ્રિયાના વિદેશ મંત્રી એલેક્ઝાન્ડરે તેમનું સ્વાગત કર્યું હતું. ઓસ્ટ્રિયાના ચાન્સેલર કાર્લ નેહામર સાથે પીએમ મોદીનું પ્રાઈવેટ ડિનર પણ ચર્ચામાં રહ્યું હતું.

આ દરમિયાન ચાન્સેલર કાર્લ નેહમરે પીએમ મોદી સાથે સેલ્ફી પણ લીધી હતી. પીએમ મોદી સાથે સેલ્ફી પોસ્ટ કરતા તેમણે કહ્યું કે વડાપ્રધાન નરેન્દ્ર મોદી, વિયેનામાં આપનું સ્વાગત છે. ઑસ્ટ્રિયામાં તમારું સ્વાગત કરવું એ આનંદ અને સન્માનની વાત છે. ઓસ્ટ્રિયા અને ભારત મિત્રો અને ભાગીદાર છે. હું તમારી મુલાકાત દરમિયાન અમારી રાજકીય અને આર્થિક ચર્ચાઓ માટે આતુર છું!'

ઓસ્ટ્રિયામાં વંદે માતરમની ઉજવણી કરવામાં આવી

વડાપ્રધાન મોદીએ સોશિયલ મીડિયા પર એક વીડિયો શેર કર્યો છે, જેમાં તેમણે કહ્યું છે કે ઓસ્ટ્રિયા તેની વાઇબ્રન્ટ સંગીત સંસ્કૃતિ માટે જાણીતું છે. મને તેની ઝલક મળી. વંદે માતરમની ધૂન પરની આ રજૂઆત ઉત્તમ હતી.

પીએમ મોદી ઓસ્ટ્રિયાના રાષ્ટ્રપતિને મળશે

પીએમ મોદી ઓસ્ટ્રિયાની મુલાકાત દરમિયાન રાષ્ટ્રપતિ એલેક્ઝાંડર વેન ડેર બેલેન સાથે મુલાકાત કરશે. તેઓ ભારત અને ઓસ્ટ્રિયાના બિઝનેસ લીડર્સને પણ સંબોધિત કરશે.

પીએમ મોદીના ઓસ્ટ્રિયા પ્રવાસનું શેડ્યૂલ

1. બપોરે 1:30 થી 1:40 વાગ્યા સુધી - ફેડરલ ચાન્સેલરી ખાતે ઔપચારિક સ્વાગત

2. બપોરે 1:40 થી 1:45 વાગ્યા સુધી – ગેસ્ટ બુક પર હસ્તાક્ષર

3. બપોરે 1:45 થી 2:30 વાગ્યા સુધી – પ્રતિનિધિમંડળ સ્તરની વાતચીત

4. બપોરે 2:30 થી 2:50 વાગ્યા સુધી - પ્રેસ સ્ટેટમેન્ટ

5. બપોરે 3 થી 3:45 વાગ્યા સુધી - ઓસ્ટ્રિયા અને ભારતના ટોચના સીઈઓ સાથે બેઠક

6. સાંજે 4 થી 5:20 સુધી - ફેડરલ ચાન્સેલરનું લંચ

7. સાંજે 5:30 થી 6 વાગ્યા સુધી - ઑસ્ટ્રિયાના રાષ્ટ્રપતિ એલેક્ઝાંડર વાન ડેર બેલેન સાથે મુલાકાત

8. સાંજે 7:10 થી 8:00 વાગ્યા સુધી - ઑસ્ટ્રિયન હસ્તીઓ સાથે મીટિંગ્સ

9. રાત્રે 8:30 કલાકે- પ્રેસ કોન્ફરન્સ

10. રાત્રે 10:30 થી 11:15 - સામુદાયિક કાર્યક્રમ

11. 11:45 કલાકે - દિલ્હી જવા રવાના થશે

(ભારતીય સમય મુજબ પૂર્ણ કાર્યક્રમ)

બંને દેશો વચ્ચેના સંબંધો કેવા રહ્યા છે?

પીએમ મોદી એવા સમયે વિયેના પહોંચ્યા છે જ્યારે ભારત અને ઓસ્ટ્રિયા બંને તેમના રાજદ્વારી સંબંધોની 75મી વર્ષગાંઠની ઉજવણી કરી રહ્યા છે. પીએમ મોદીનો આ ઓસ્ટ્રિયા પ્રવાસ ઘણી રીતે મહત્વપૂર્ણ છે. ભારતીય વડાપ્રધાન 41 વર્ષ બાદ ઓસ્ટ્રિયા જઈ રહ્યા છે. 1983માં તત્કાલિન વડાપ્રધાન ઈન્દિરા ગાંધી ઓસ્ટ્રિયા ગયા હતા અને આ તેમની બીજી ઓસ્ટ્રિયા મુલાકાત હતી. ઈન્દિરા ગાંધી આ પહેલા 1971માં પણ ઓસ્ટ્રિયા ગયા હતા. તેમના પહેલા દેશના પહેલા પીએમ જવાહરલાલ નેહરુએ 1955માં ઓસ્ટ્રિયાની પ્રથમ મુલાકાત લીધી હતી.

ભારતના વડાપ્રધાન ઉપરાંત તત્કાલિન રાષ્ટ્રપતિ કેઆર નારાયણન 1999માં ઓસ્ટ્રિયા અને 2011માં તત્કાલિન રાષ્ટ્રપતિ પ્રતિભા દેવીસિંહ પાટીલ ગયા હતા. ભારત અને ઓસ્ટ્રિયા વચ્ચે સાંસ્કૃતિક વિનિમય 16મી સદીનો છે. ભારત અને ઓસ્ટ્રિયાની રાજકીય મુલાકાતો પહેલા પણ સારા સંબંધો રહ્યા છે. રવીન્દ્રનાથ ટાગોર 1921 અને 1926માં જ ત્યાં ગયા હતા. આ સિવાય ત્યાં લગભગ 31 હજાર ભારતીયો રહે છે, જેમાં મોટાભાગના લોકો પંજાબ અને કેરળના છે. આ લોકો અહીં આરોગ્ય ક્ષેત્ર સહિત ઘણી જગ્યાએ કામ કરી રહ્યા છે.