મહારાષ્ટ્રના અમરાવતી ડિવિઝનમાં છેલ્લા 6 મહિનામાં 557 ખેડૂતોએ આત્મહત્યા કરી હોવાનો સરકારી અહેવાલમાં દાવો કરવામાં આવ્યો છે.

મહારાષ્ટ્રના અમરાવતી હેઠળ આવતા 5 જિલ્લામાં આ વર્ષે જાન્યુઆરીથી જૂન વચ્ચે 557 ખેડૂતોએ આત્મહત્યા કરી છે. તેમાં વિભાગના પાંચ જિલ્લાઓ અમરાવતી, અકોલા, બુલઢાણા, વાશિમ અને યવતમાલનો સમાવેશ થાય છે. અમરાવતી ડિવિઝનલ કમિશનરેટ દ્વારા તૈયાર કરાયેલા રિપોર્ટમાં જણાવાયું છે કે 2024માં જાન્યુઆરીથી જૂન વચ્ચે ડિવિઝનમાં કુલ 557 ખેડૂતોએ આત્મહત્યા કરી છે. તેમાંથી સૌથી વધુ 170 આત્મહત્યા અમરાવતી જિલ્લામાં નોંધાઈ હતી, ત્યારબાદ યવતમાલમાં 150, બુલઢાણામાં 111, અકોલામાં 92 અને વાશિમમાં 34 આત્મહત્યા નોંધાઈ હતી.

સત્તાવાર અહેવાલમાં જણાવાયું છે કે સરકારે 53 કેસોમાં મૃતકોના પરિવારોને સહાય પૂરી પાડી છે, જ્યારે 284 કેસની તપાસ બાકી છે. અહેવાલમાં ઉલ્લેખિત આંકડાઓ પર પ્રતિક્રિયા આપતા અમરાવતીના સાંસદ બળવંત વાનખડેએ જણાવ્યું હતું કે મહારાષ્ટ્ર એવા રાજ્યોમાંનું એક છે જ્યાં ખેડૂતોની આત્મહત્યાની સંખ્યા સૌથી વધુ છે અને આ કિસ્સામાં અમરાવતી સમગ્ર રાજ્યમાં ટોચ પર છે.

એજન્સી અનુસાર, કોંગ્રેસના નેતા અને સાંસદ બળવંત વાનખેડે જણાવ્યું હતું કે પાકનું નુકસાન, પર્યાપ્ત વરસાદનો અભાવ, વર્તમાન દેવાનો બોજ અને સમયસર કૃષિ લોનનો અભાવ એ મુખ્ય કારણો છે જે ખેડૂતોને આ પગલું ભરવા માટે દબાણ કરે છે. તેમણે કહ્યું કે સરકારે ખેડૂતોની આવક બમણી કરવાની ખાતરી પૂરી કરવી જોઈએ અને તેમને સહાય પૂરી પાડવી જોઈએ.

રાજ્ય સરકારના વસંતરાવ નાઈક શેતકરી સ્વાવલંબી મિશનના પ્રમુખ નિલેશ હેલોન્ડે પાટીલે જણાવ્યું હતું કે ખેડૂતોની આત્મહત્યા એ ગંભીર મુદ્દો છે અને આવા આત્મહત્યાના કિસ્સાઓને રોકવા માટે ઉકેલ શોધવાના પ્રયાસો કરવામાં આવી રહ્યા છે. તેમણે કહ્યું કે સ્થાનિક વહીવટીતંત્ર વિવિધ સરકારી યોજનાઓ દ્વારા ગ્રામ પંચાયત સ્તરે ખેડૂતો સુધી તેમની આવક વધારવા તેમજ તેમના બાળકોના શિક્ષણ અને તેમના પરિવારના સભ્યોના તબીબી ખર્ચમાં મદદ કરી રહ્યું છે. સરકાર ખેડૂતોની સાથે છે.

તેમણે કહ્યું કે શેતકરી સ્વાવલંબી મિશન ખેડૂતો અને વીમા કંપનીઓ વચ્ચે સરળ સંચારની સુવિધા પણ આપી રહ્યું છે. તેમણે કહ્યું કે ખેડૂત આત્મહત્યા એ ગંભીર બાબત છે અને મિશન આવા મૃત્યુને રોકવા માટે ઉકેલ શોધવા પર કામ કરી રહ્યું છે.