છત્તીસગઢના કાંકેર જિલ્લામાં મંગળવારે એક 30 વર્ષની નક્સલવાદી મહિલાને સુરક્ષા જવાનોએ મારી નાખી હતી. મહિલા નક્સલવાદી પર 8 લાખ રૂપિયાનું ઈનામ હતું. કાંકેરના પોલીસ અધિક્ષક ઇન્દિરા કલ્યાણ ઇલેસેલાએ જણાવ્યું હતું કે છોટા બેથિયા પોલીસ સ્ટેશનના બીનાગુંડા ગામમાં જ્યારે સુરક્ષાકર્મીઓ તે વિસ્તારમાં નક્સલ વિરોધી અભિયાન ચલાવી રહ્યા હતા ત્યારે ગોળીબાર શરૂ થયો હતો.
રાઈફલ મળી
ડિસ્ટ્રિક્ટ રિઝર્વ ગાર્ડ (DRG)ના અધિકારીએ જણાવ્યું હતું કે બસ્તરના લડવૈયાઓ અને બોર્ડર સિક્યુરિટી ફોર્સ (BSF)ની 30મી અને 94મી બટાલિયનના સુરક્ષાકર્મીઓ નક્સલ વિરોધી ઓપરેશનમાં સંયુક્ત રીતે સામેલ હતા. ગોળીબાર બંધ થયા બાદ નક્સલવાદી મહિલાના મૃતદેહ સિવાય સ્થળ પરથી .303 રાઈફલ અને .315 રાઈફલ મળી આવી હતી. ઈન્દિરા કલ્યાણે આ માહિતી આપી હતી.
પોલીસ અધિક્ષકે જણાવ્યું કે માર્યા ગયેલી નક્સલવાદી મહિલાની ઓળખ રીટા મદિયમ તરીકે થઈ છે, જે બીજાપુર જિલ્લાના મનકેલી ગામની રહેવાસી હતી. તે પીપલ્સ લિબરેશન ગેરિલા આર્મી (PLGA)ની સક્રિય સભ્ય હતી, જેના પર 8 લાખ રૂપિયાનું ઈનામ હતું.
નક્સલવાદીઓ સામેની કાર્યવાહી તેજ કરવામાં આવી
છત્તીસગઢમાંથી નક્સલવાદીઓ અને તેમના સંગઠનને ખતમ કરવા માટે સુરક્ષા જવાનો રાજ્યના વિવિધ વિસ્તારોમાં સતત ઓપરેશન ચલાવી રહ્યા છે. પોલીસે જણાવ્યું કે, ચાલી રહેલા નક્સલ વિરોધી ઓપરેશનને કારણે આ વર્ષે 139 નક્સલવાદીઓ માર્યા ગયા છે. જેમાંથી બસ્તર વિસ્તારમાં 137 માઓવાદીઓ અને રાયપુર ડિવિઝનના ધમતારી વિસ્તારમાં 2 માઓવાદી માર્યા ગયા હતા.
ઉપરાંત, બસ્તર પોલીસના જણાવ્યા અનુસાર, આ સમયગાળા દરમિયાન 498 માઓવાદીઓની ધરપકડ કરવામાં આવી છે જ્યારે 461 માઓવાદીઓએ આત્મસમર્પણ કર્યું છે.